o povo contra ence

O PSOE sondea novos posicionamentos a respeito de ENCE

2008-05-07T10:45:00.003-04:00

Que o Conselleiro de Medio Ambiente non é de fiar é algo que non paga a pena repetir. Tras a aprovación da autorizacion ambiental integrada a ENCE, segue a manter na recámara a sua xogada de levar a indústria ás Pontes, unha vez que o lago de ENDESA estea cheo. Este enganoso Traslado que agarda por un acordo coa celulosa que depende, mui posívelmente, dos cartos públicos que a Xunta estea disposta a mobilizar. Mentres, con esta autorización, o PSOE blinda por tres anos máis a permanéncia do complexo ENCE-ELNOSA en Lourizán e abre un paréntese de duración indefinida no tema "traslado-peche", á espera do desgaste de Lores e do BNG en Pontevedra, e desprega un abano de posibilidades, entre as que estaría, unha vez máis, a permanéncia da celulosa en Lourizán. Mais non nos enganemos. Se o bipartido tivese valentía política hai tempo que terían decidido fechar-lle o camiño a ENCE, forza-la a procurar unha nova ubicación e condicionar-lle esta a cumprir unha série de obrigas, entre as que se encontrarían uns novos limites de produción e un novo proceso produtivo. Mais non son capaces nen de iso, e aqui tamén ten responsabilidade o conselleiro dos tarabelos. Por certo..., do BNG. De pouco serve ver nas manifestacións a Bieito Lobeira ou a Teresa Casal, tenente de alcalde do PSOE en Pontevedra. O xogo real está en San Caetano. E o enfraquecimento das posicións nacionalistas é manifesto.

Cómo entran os lodos de ENCE no Ulla?

2008-05-05T13:14:00.003-04:00

As minas de Touro reparten-se en dous sectores, Bama e Arinteiro. No sector de Bama, cando chove, a agua escoa ou filtra-se através dos lodos que se utilizan para restaurar os taludes, e a agua accede á lagoa superior, a máis grande das duas existentes neste sector. A vexetación acuática medra nesta lagoa pero non é suficiente para neutralizar a carga contaminante. Desta lagoa sae un canal que vai dar a unha segunda lagoa, extremadamente contaminada e de aspecto azul verdoso. Desde esta lagoa, cando chove, a agua escapa libremente ao rego Xeimar, tributário do Brandelos. Este río, carregado de contaminantes orgánicos e metais pesados, chega ao rio Ulla, sendo un dos principais focos de contaminación do Ulla e, tamén, da ría de Arousa.

ENCE contamina tamén a ría de Arousa

2008-05-05T12:56:00.002-04:00

Desde fins dos noventa, a ENCE leva resíduos da sua depuradora ás minas de Touro, onde unha empresa os deposita e emprega para a suposta restauración dos taludes da entulleira, afectados pola presenza de material carregado de sulfuros metálicos. Esta suposta restauración permite-lle a ENCE levar toneladas de lodos tóxicos que, ao se manexar sen a adecuación perimetral necesária ao redor das entulleiras, accede aos regos afluentes do Ulla, que, como sabemos, vai dar á ria de Arousa. Basta con botar un ollo ás lagoas que salpican as minas para comprobar cómo están carregadas de matéria orgánica procedente destes lodos e cómo, cando chove, sobordan e a agua contaminada vai dar aos regos Xeimar e Brandelos. Un exemplo máis da insustentabilidade do modelo industrial e selvícola de ENCE.

A eucaliptización

2008-04-01T11:56:00.003-04:00

A eucaliptización, un fenómeno galego con equivaléncias na Indonésia, Sudamérica, Laos, etc, ten a sua orixe na necesidade que teñen as celulosas en eliminar calquer alternativa produtiva baseada en madeiras autóctonas.

As cortas de carvallos e bidueiras acontecen con impunidade na terra Navia-Eo

Outras cortas na zona de Santa Columba, entre Boal e A Veiga

O proceso continua pouco tempo despois co plantío de eucaliptos

Asi transforman o territorio e convirten os montes nun ermo, desvirtuando a nosa paisaxe e colonizando a economía rural

os stocks da perversión

2008-04-01T11:31:00.003-04:00

Centos de miles de metros cúbicos de madeira queimada forman os stocks que moven a economía da perversión que as celulosas despregan nos tempos duros. Así como suscriven seguros con entidades bancárias para blindar-se ante os vaivéns do dólar, tamén teñen por costume aprovisionar-se de grandes cantidades de madeira a baixo prezo cando a tonelada de pasta de celulosa vai cara. Desta forma, cando o prezo atravesa por valores mui baixos, as celulosas galegas e lusas manteñen a competitividade abaratando custes de produción ao tirar da madeira queimada dos stocks. Na foto, madeira queimada no stock de PORTUCEL.

Tráfico de especuladores

2008-04-01T11:16:00.003-04:00

Tras os lumes de 2005 e 2006, milleiros de toneladas de madeira de eucalipto foron retiradas dos nosos montes e malvendidas aos intermediários, que as colocaron maiormente nas cinco celulosas do noroccidente ibérico (Navia, Pontevedra, Figueira da Foz e Aveiro). Se no ano 2005 se estima en 800.000 m3 a cantidade extra de madeira barata que chegou ás celulosas, en 2006 e 2007 a cifra superaría os tres millóns. Na imaxe, os camións levan a madeira queimada, comprada a prezos de saldo nos montes galegos e agardan para a pesaxe na celulosa da CELBI.

A frustrada entrada de Caixa Galicia en ENCE

2008-01-18T13:37:00.000-05:00

A entrada de Caixa Galicia foi respondida pola sociedade galega de formas diversas. Mentres a APDR iniciaba unha campaña dirixida a desacreditar esta entidade diante da sua clientela, Erva chamaba á participación en concentracións de protesta diante da sua sucursal principal en Compostela. En ambos casos o obxectivo procurado era detacar a cumplicidade da Caixa Galicia na destrución do património forestal galego se seguía a participar en ENCE. Meses despois destas campañas e da explosión dun artefacto na sucursal central compostelana, José Luis Méndez anunciaba que Caixa Galicia abandonaba a sua aposta en ENCE.

Práticas silvícolas intensivas degradan os montes e perpetúan a eucaliptización

2008-01-18T12:50:00.000-05:00

O modelo silvícola intensivo que NORFOR, filial forestal de ENCE, está a desenvolver en numerosos montes do país supón unha progresiva degradación dos recursos edáficos (a calidade do solo para o crecimento de árvores), pola sucesión de distintos turnos de crecimento de eucaliptos, pero tamén unha degradación acelerada pola execución de grandes subsolados e movimentos masivos de terra. Estes labores, que se executan despois da corta dunha parcela, propician a erosión e incluso a afección de cursos fluviais polo arrastre de terra e pedras tras episódios de grandes precipitacións. Para mostra, o acontecido en dous prédios de Norfor, Coto Muiño e O Vachao. Neste último, a enxurrada de terra e pedras foi dar ao rio Tambre.

A entrada en acción do Gonitero fai fracasar ao eucalipto como alternativa económica para os nosos montes

2008-01-18T12:37:00.000-05:00

A presenza masiva dun gurgullo defoliador chegado á Galiza desde as antípodas, o Gonipterus acutellatus, coñecido xa popularmente como "o gonitero", está a ralentizar o crecimento dos eucaliptos en miles de hectareas de plantíos espallados por todo o país. Nen a luita biolóxica, nen a química, nen a "integrada", logran frear os efectos devastadores alí onde se propaga unha povoación deste insecto. Algúns proprietários están xa desfacendo-se de plantíos afectados que, tras 7 ou 8 anos de crecimento, non parecen recuperar-se tras os tratamentos e seguen sen medrar (a própria NORFOR esta-o facendo nalgún dos seus prédios). Un factor máis, pois, para reconsiderar o eucalipto como alternativa silvícola nos nosos montes.

A arca da Piosa segue arrodeada pola eucaliptose

2008-01-16T13:06:00.000-05:00

A pesar de existir un convénio entre a Xunta e ENCE-NORFOR, para a conservación do património megalítico, no prédio de Coto Muiño seguen a medrar os eucaliptos ao redor dun dos mellores dolmens da nosa terra. Unha proba máis do desprezo co que a filial forestal de ENCE trata a nosa cultura, da que forma parte fundamental a paisaxe.

NORFOR, filial de ENCE, envenena os montes

2008-01-16T12:48:00.000-05:00

A aplicación masiva e indiscriminada de herbicidas

(glifosato) nos plantíos de eucalipto ten sido denunciada reiteradamente. Ás veces estas aplicacións fan-se descontroladamente, afectando cursos de agua, como o acontece frecuentemente no prédio Coto Muiño, en Zas-Vimianzo.

solidariedade galega contra ence no uruguai

2008-01-16T12:41:00.000-05:00

No seu dia, unha representación do ecoloxismo galego se concentrou diante do consulado do Uruguai en Vigo para mostrar o rexeitamento ao proceso expansivo de ENCE neste país, que xa leva uns anos a padecer o modelo espoliador forestalista e industrial que promoven as celulosas.

a economia perversa das celulosas

2008-01-16T11:30:00.000-05:00

A posta no mercado de centos de miles de toneladas de madeira queimada non é un facto novo que acontecese por primeira vez a raíz dos lumes de 2006. Xa no 2005, cando Fraga perdeu as eleicións, os incéndios padecidos deron paso á maquinária extractiva, que se calcula que retirou en menos de 9 meses máis de 700.000 toneladas de madeira queimada de eucalipto. Este sistema, que ven existindo na Galiza e en Portugal desde hai decénios, forma parte do sistema operativo deses enxendros chamados fábricas de celulosa. Cando os prezos da celulosa caen no mercado internacional debido a que éste se satura ao teren entrado en produción novas factorías en mercados afastados (Sudamérica, sudeste asiático, etc.), as empresas que poden sufrir maiores perdas son as que non dispoñen das matérias primas aos prezos máis económicos, por exemplo as celulosas de Portugal e a ENCE. Xestionar ben os stocks de madeira nos parques de armacenaxe é fundamental para poder pasar o trance da caída de prezos da mellor maneira posível. Algo así como a parábola da chicharra e a formiga..., xa se sabe, a primeira acumula nos bos tempos, para poder pasar a gusto os maos tempos.